د ترلاسه شوي شکمن راپور (STR) له مخي، یو شخص د ټولنیزو شبکو له لاري د جعلي هویت په کارولو سره متضرر ته ادعا کړې چي یو میلیون امریکایي ډالر د میراث په توګه د هغه لپاره ځانګړي شوي دي. وروسته له متضرر څخه غوښتل شوي چي د پیسو د کڅوړي د ترلاسه کولو په موخه، په افغانستان کي یو بانکي حساب ته ۸۰ زره افغانۍ جمع کړي. د پیسو له ترلاسه کولو وروسته، فریب ورکوونکی شخص ته لاسرسی نه کیږي.
د دې مرکز د څېړني او تحلیل پر بنسټ، په کارول شوي بانکي حساب کي د بېلابېلو ولایتونو څخه د پنځو اشخاصو لخوا په ټولیز ډول ۵۱۹٬۰۰۰ افغانۍ جمع شوي وې. د حساب د مالک او پیسې جمع کوونکو ترمنځ اړیکه څرګنده نه وه او وجوه (پیسې) له جمع کېدو وروسته، د حساب د مالک لخوا په څو معاملو کې د نغدي پیسو ایستلو، د کارت لوستلو ماشینونو (POS)، د پیسو اتومات ماشینونو (ATM ) او د موبایل کرېډیټ اخیستلو له لاري انتقال او ایستل شوي دي. د حساب مالک له متضررینو سره هر ډول اړیکه رد کړې ده.
نوموړې قضیه د تحلیلي موندنو سره یوځای د تحقیقاتو او قانوني اجراآتو په موخه تنفیذي مراجعو ته راجع شوه او وروسته د عدلي تعقیب لپاره عدلي او قضایي مراجعو ته واستول شوه. د اړوندې محکمې د حکم پر بنسټ، متهم مدعي بالاصاله ته د ۷۳٬۰۰۰ افغانیو په بېرته ورکولو او ۲۸ ورځو حبس باندي محکوم شوی دی.